ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ – ᐊᐱᕐᓲᑎᐅᒍᓪᓕᐅᓲᑦ

 

ᐱᔭᕇᕐᓗᒍ ᒪᓂᓗᒍᓗ ᑐᑦᓯᕋᐅᑎᒃ

ᐊ – ᐱᐅᓕᒍᓐᓇᑕᕌ ᖃᕆᑕᐅᔭᑎᒎᕐᑐᖅ ᑕᑕᑦᓴᒐᑦᓴᔭᖅ ᐱᔭᕇᖔᕐᓂᐊᓗᒍ ᓯᐊᕈ?

ᑭ – ᐊᐅᑲ, ᐱᒋᐊᓪᓚᕕᖃᖕᖏᑐᖅ ᐱᐅᓕᒍᓐᓇᕆᐊᖓ ᑕᑕᑦᓴᒐᑦᓴᔭᖅ ᑕᑕᕐᓭᕉᑕᕆᓗᑎᑦ.  ᐱᔭᕆᐊᑭᓪᓕᑎᕐᓗᒍ ᑖᓐᓇ ᐱᓇᓱᐊᕐᓂᖅ, ᐅᓐᓂᑑᔾᔨᕗᒍᑦ ᑲᑎᕐᓱᐃᓯᒪᕐᖄᓚᐅᑲᓪᓗᑎᑦ ᐃᓗᓐᓇᓯᐊᖏᓐᓂᒃ ᐱᓯᒪᒋᐊᓕᑎᓐᓂᒃ ᐊᓪᓚᖁᑎᓂᒃ ᖃᐅᔨᒪᒍᑎᐅᒋᐊᓕᓐᓂᓗ ᐱᒋᐊᓚᐅᕐᓇᒃ ᐱᔭᕇᒍᑎᒋᓂᐊᕐᓗᒋᑦ.

 

ᐊ – ᒪᓂᔨᒋᐊᖃᕐᖁᖔ ᑐᑦᓯᕋᐅᑎᒥᒃ ᐊᑐᓂ ᐱᔾᔪᔨᒍᑎᒧᑦ ᐅᕝᕙᓘᓐᓃᑦ ᐱᖁᑎᒧᑦ ᐅᓐᓂᑑᑕᐅᔪᒧᑦ ᐱᐊᕋᕋᓄᑦ?

ᑭ - ᐊᐅᑲ, ᒪᓂᔨᒍᓐᓇᖁᑎᑦ ᐊᑕᐅᓯᕐᒥᒃ ᑐᑦᓯᕋᐅᑎᒥᒃ ᐃᓗᓕᓕᒻᒥᒃ ᐃᓗᓐᓇᓯᐊᖏᓐᓂᒃ ᐅᓐᓂᑑᑕᐅᔪᓂᒃ ᐱᔾᔪᔨᕕᐅᑉ ᐱᐊᕋᕐᓄᑦ.  ᓱᕐᖁᐃᓯᐊᕆᑦ ᐃᓚᐅᑎᑦᓯᓯᐊᕐᓂᒥᒃ ᐃᓗᓐᓇᓯᐊᖏᓐᓂᒃ ᐱᓯᒪᒋᐊᓕᑎᓐᓂᒃ ᐊᑐᓂ ᑐᑦᓯᕋᐅᑎᐅᔫᑉ ᐱᔾᔪᔨᕕᐅᑉ ᐅᕝᕙᓘᓐᓃᑦ ᐱᖁᑎᐅᑉ.

 

ᐊ - ᒪᓂᔨᒍᓐᓇᖁᖔ ᐱᐊᕋᕐᒧᑦ ᐱᖁᔭᑎᒍᑦ ᑲᒪᔨᒋᔭᐅᓪᓚᕿᖕᖏᑯᒪ ᐅᕝᕙᓘᓐᓃᑦ ᐊᖓᔪᕐᖄᕆᔭᐅᓂᑎᒍᑦ ᐊᖓᔪᕐᖃᐅᕕᖃᖕᖏᑐᐊᕈᒪ?

ᑭ - ᐋ, ᒪᓂᔨᒍᓐᓇᖁᑎᑦ ᐱᒍᔾᔨᓗᑎᑦ ᐱᐊᕋᕐᒥᒃ, ᑭᓯᐊᓂ ᓄᐃᑦᓯᒋᐊᖃᒐᔭᕐᑐᑎᑦ ᓱᓕᓂᕃᒍᑎᒥᒃ ᐊᖓᔪᕐᖄᖏᑦᑕ ᐊᖏᕐᓂᒋᓐᓂᒃ.  ᐊᑎᓕᐅᕐᓂᐅᒍᓐᓇᑐᖅ ᑕᑕᕐᓴᒐᑦᓴᔭᐅᓗᓂ ᐅᕝᕙᓘᓐᓃᑦ ᖃᕆᑕᐅᔭᑎᒎᕐᓗᓂ ᐊᖏᕐᓂᐅᒍᓐᓇᑐᖅ [ᑕᑯᒋᐊᕐᕕᒃ ᖃᕆᑕᐅᔭᑎᒍᑦ ᐊᖏᕈᑎᐅᑉ ᑕᑕᕐᓴᒐᑦᓴᔭᖓ].

 

ᐊ – ᓇᓪᓕᖏᓐᓂ ᐅᖃᐅᓯᕐᓂᒃ ᐊᑐᕐᑐᐃᑦ ᑖᒃᑯᐊ ᑕᑕᕐᓴᒐᑦᓴᔦᑦ ᐊᑐᐃᓐᓇᐅᔪᑦ?

ᑭ – ᓱᕐᖁᐃᓯᐊᕈᒪᒧᑦ ᑐᑭᓯᑦᓯᐊᒍᓐᓇᓂᕐᒥᒃ, ᑕᑕᑦᓴᒐᑦᓴᔦᑦ ᐊᑐᐃᓐᓇᑐᔪᑦ ᒍᐃᒍᐃᑎᑐᑦ-ᐃᓄᒃᑎᑐᑦ ᐊᒻᒪᓗ ᖃᓗᓐᓈᑎᑐᑦ-ᐃᓄᒃᑎᑐᑦ.  ᑭᐅᒍᓐᓇᖁᑎᑦ ᑖᒃᑯᓅᓇᑭᓯᐊᓂ ᒍᐃᒍᐃᑎᑐᑦ ᖃᓪᓗᓈᑎᑐᓪᓘᓃᑦ.

 

ᐊ – ᑭᓈ ᐊᓪᓚᒍᓐᓇᑐᖅ ᐅᓐᓂᑑᑎᐅᑦᓱᓂ ᐊᓪᓚᓯᒪᔪᒥᒃ?

ᑭ - ᐅᓐᓂᑑᑎᒍᑎᐅᔪᖅ ᐊᓪᓚᓯᒪᔪᑦ ᐊᓪᓚᑕᐅᓂᖃᕆᐊᓕᒃ ᐱᓕᓂᕐᒧᑦ ᐃᓚᐅᔪᒧᑦ ᐱᐊᕋᐅᑉ ᑲᒪᒋᔭᐅᕕᖓᓃᑦᑑᑉ.  ᐃᑉᐱᒋᓗᒍ ᖃᓄᐃᑦᑑᓂᖓ ᐱᔾᔪᔨᓂᖅ ᐅᕝᕙᓘᓐᓃᑦ ᐱᖁᑏᐅᑉ ᑐᑦᓯᕃᔭᐅᔫᑉ, ᐊᑑᑎᓂᐅᒋᐊᖃᕋᔭᑐᐃᓐᓇᕆᐊᓕᒃ ᑖᓐᓇ ᐱᓕᓂᖅ ᐃᓚᐅᒋᐊᓕᒃ ᐱᓕᓂᐅᔪᓅᑦ.  ᐊᓪᓚᓯᒪᔪᖅ ᐊᓪᓚᑕᕕᓂᖅ ᐊᖓᔪᕐᖄᕆᔭᐅᔪᓄᑦ ᐊᖏᕐᑕᐅᒍᓐᓇᖏᑦᑐᖅ ᓴᐳᒻᒥᓂᕐᒧᑦ ᐊᓪᓚᓯᒪᔪᖁᑎᐅᓗᓂ ᑐᑦᓯᕋᐅᑎᒧᑦ.

 

ᐊ – ᐃᑲᔪᕐᑕᐅᒍᒪᕗᖓ ᑕᑕᕐᓭᓂᕐᒧᑦ ᑐᑦᓯᕋᐅᑎᒥᒃ.  ᑭᓇᒨᑦ ᖃᐅᔨᒋᐊᕋᔭᕐᖁᖓ?

ᑭ – ᖃᐅᔨᒋᐊᕐᕕᖃᒍᓐᓇᖁᑎᑦ ᑖᒃᑯᓄᖓ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐱᓇᓱᐊᖃᑎᒌᑦᑐᑦ ᐃᑲᔪᕐᓯᔭᐅᓂᕐᒧᑦ ᑖᑦᓱᒧᖓ ᑕᑕᕐᓴᒐᑦᓴᔭᒧᑦ.  ᑭᖕᖒᒪᓇᕐᐸᑦ, CFI ᐱᓇᓱᒃᑏᑦ ᐱᔭᕇᒍᔾᔨᒍᓐᓇᒥᔪᑦ ᐃᓕᓐᓂᒃ ᐅᖄᓚᐅᑎᑎᒍᑦ ᐅᕝᕙᓘᓐᓃᑦ ᐊᓯᐊᒍᑦ.

ᐊ - ᑭᓈ ᑭᖑᓪᓕᐹᒥᒃ ᑐᑭᑖᓲᖅ ᐱᔾᔪᑎᒋᓗᒍ ᑮᓇᐅᔦᓕᕿᐅᑎᒻᒪ?

ᑭ - ᑭᖑᓪᓕᐹᖅ ᑐᑭᑖᕐᓂᖅ ᑮᓇᐅᔦᑦ ᒥᑦᓵᓄᑦ ᑐᑭᑕᕐᑕᐅᓲᖅ ᓄᓇᓕᑐᖃᑦᓴᔦᑦ ᐱᔾᔪᔨᕕᖓᑕ ᑳᓇᑕᒥ (ISC). ISC ᓇᐅᑦᓯᑐᓲᑦ ᑐᑦᓯᕋᐅᑎᓂᒃ ᑐᖕᖓᕕᒋᓗᒋᑦ ᐅᓐᓂᑑᑎᓕᐊᕕᓃᑦ ᓴᐳᒻᒥᒍᑏᓪᓗ ᒪᓕᑦᑐᑦ ᑐᑦᓯᕋᐅᑎᒥᒃ ᐱᓯᒪᔪᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐱᓇᓱᐊᕐᑐᖁᑎᖏᓐᓂ.

 

ᐊ- ᖃᓄᓪᓗᐊᑎᒌᑦ ᑭᐅᔭᐅᓂᖃᒐᔭᕐᑐᖅ ᐱᔾᔪᑎᒋᓗᒍ ᐊᖏᕐᑕᐅᓂᖓ ᐊᖏᕐᑕᐅᖏᓐᓂᖓᓘᓐᓃᑦ ᑮᓇᐅᔦᓕᕿᐅᑏᑦ?

ᑭ- ᒪᓂᔨᓕᑐᐊᕈᕕᑦ ᑐᑦᓯᕋᐅᑎᓐᓂᒃ ᑖᑦᓱᒧᖓ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ, ᑭᐅᔭᓂᖃᒍᓐᓇᑐᖅ ᐅᓪᓘᓂᑦ ᒪᕐᕉᓄᑦ ᑕᓪᓕᒪᓄᑦ ᐱᓇᓱᓐᓀᑦ ᐅᓪᓗᐃᑦ.  ᑭᓯᐊᓂᓕ, ᑭᖑᓪᓕᐹᖅ ᑐᑭᑖᕆᓂᖅ ᐱᔾᔪᑎᒋᓗᒍ ᑮᓇᐅᔦᑦ ᐃᓕᖓᕗᑦ ᓄᓇᓕᑐᖃᑦᓴᔦᑦ ᐱᔾᔪᔨᕕᒃ ᑳᓇᑕᒥ (ISC), ᐊᐅᓚᑦᓯᒋᐊᓪᓚᕕᖃᕋᑕᓗ ᐊᖏᕐᓂᖏᑦᑕ ᖃᖓᐅᒐᔭᕐᓂᖏᓐᓂᒃ.

 

ᐊ - ᓱᒋᐊᖃᕐᖁᖔ ᑭᐅᔭᐅᓐᓂᖏᑐᐊᕈᒪ ᑮᓇᐅᔦᓕᕿᐅᑎᒻᒪ ᒥᑦᓵᓄᑦ ᑖᒃᑯᓇᖕᖓᑦ ᓄᓇᓕᑐᖃᑦᓴᔦᑦ ᐱᔾᔪᔨᕕᒃ ᑳᓇᑕᒥᒃ ᑭᐅᔭᐅᔪᑦᓴᕈᕐᓯᒪᓕᕈᒪ?

ᑭ - ᖃᐅᔨᒋᐊᕐᕕᖃᕆᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐱᓇᓱᐊᖃᑎᒌᕐᑐᖏᓐᓂᒃ ᐁᑦᑐᐃᓗᑎᓪᓗ ᐱᐊᕋᐅᑉ ᐊᑎᖓᓂᒃ.  ᑖᒃᑯᐊ ᐱᐊᕋᐅᑉ ᐱᔾᔪᔭᐅᓂᖓ, ᐃᓗᓯᕐᓱᓂᖓ, ᐅᕝᕙᓘᓐᓃᑦ ᖃᓄᐃᖕᖏᓯᐊᕐᓂᖓ ᐃᓕᒪᓇᕐᑐᒦᑉᐸᑦ, ᖃᐅᔨᑎᑦᓯᓴᐅᑎᒋᒋᑦ ᐅᕙᒃᑎᓂᒃ ᖃᐅᔨᑎᑦᓯᓂᐊᕋᑦᑕ ᓄᓇᓕᑐᖃᑦᓴᔦᑦ ᐱᔾᔪᔨᕕᒃ ᑳᓇᑕᒥᒃ (ISC) ᓯᕗᓪᓕᐅᔭᐅᓂᐊᕐᒪᑦ ᑲᒪᒋᔭᐅᓂᖓ.  ᑖᓐᓇ ᐱᐊᕋᐅᑉ ᖃᓄᐃᓕᖓᓂᕐᒦᓂᖓ ᐊᓯᔾᔨᐸᑦ ᑕᕝᕙᓂ ᐱᓇᓱᐊᕐᑕᐅᕈᑕᕆᓂᖓᓂ, ᑲᔪᖏᕐᓭᕗᒍᑦ ᐃᓕᓐᓂᒃ ᖃᐅᔨᒋᐊᕐᕕᖃᒍᓐᓇᕆᐊᑉᐱᑦ ᑐᓴᕐᑎᓯᓗᑎᓪᓗ ᐅᕙᒃᑎᓂᒃ ᑐᓴᕐᑕᐅᒋᐊᓕᓐᓂᒃ.

 

ᐊ- ᒪᓂᔨᓯᒪᕗᖓ ᑮᓇᐅᔦᓕᕿᐅᑎᓂᒃ ᐊᖏᕐᑕᐅᒪᑦᓱᑎᒃ, ᑭᓯᐊᓂ ᑭᖑᓪᓕᐸᖅ ᐊᑭᓖᑎᑦᓯᐅᑎᒃ ᐅᓄᕐᓂᓴᖅ ᓯᕗᓪᓕᕆᔭᐅᓚᐅᔪᒥᒃ ᐊᖏᕐᑕᕕᓂᐅᑉ ᐅᓄᕐᓂᖓᓂᒃ.  ᓱᒋᐊᖃᕐᖁᖔ?

ᑭ - ᒪᓂᔨᒋᑦ ᓄᑖᒥᒃ ᑐᑦᓯᕋᐅᑎᒥᒃ ᐊᖏᕐᑕᐅᒋᐊᓕᒻᒥᒃ ᐅᓄᕐᓯᒋᐊᕈᑎᖏᓐᓂᒃ, ᐃᓚᐅᑎᓪᓗᒍ ᐊᓪᓚᖁᑎᖓᑕ ᑭᓯᑦᓯᒍᑎᖓᓂᒃ ᐃᓕᖓᔪᒥᒃ ᑖᑦᓱᒧᖓ ᑮᓇᐅᔦᓕᕿᐅᑎᒃᖄᕕᓂᕐᒥᒃ ᐊᒻᒪᓗᒋᐊᓪᓚ ᐱᔭᕕᓂᕐᐱᑦ ᐊᑭᓖᑎᑦᓯᐅᑎᐅᑉ, ᑖᒃᑯᐊ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᕿᒥᕐᕈᒋᐊᓕᕐᕿᓂᐊᕐᒪᑕ ᑐᑦᓯᕋᐅᑎᓐᓂᒃ.

 

ᐊ - ᐱᐊᕋᒐ ᑭᖕᖒᒪᑦᓯᔪᖅ ᑖᒃᑯᓂᖓᑦᓭᓇᖅ ᐱᔾᔪᔨᒍᑎᓂᒃ ᐊᕐᕌᒍᑕᒫᑦ.  ᒪᓂᔨᒍᓐᓇᖁᖔ ᐊᑭᓕᐅᑎᑦᓴᓅᓕᖓᔪᒥᒃ ᐊᑐᕐᓗᖓ ᑖᑦᓱᒥᖓᑦᓭᓇᖅ ISC ᐊᓪᓚᖁᑎᖓᑕ ᑭᓯᑦᓯᒍᑎᖓᓂᒃ ᑭᖑᓪᓕᕆᓕᕐᑕᖓᓄᑦ ᐊᕐᕌᒎᑉ?

ᑭ - ᐊᐅᑲ, ᐱᔾᔪᑎᒋᓗᒍ ISC ᐊᓪᓚᖁᑎᖓᑕ ᑭᓯᑦᓯᒍᑎᖓ ᐃᓚᒋᔭᐅᒻᒪᑦ ᑮᓇᐅᔭᓄᑦ ᐱᐊᕋᕐᒨᖏᑦᑐᖅ. ᑌᒣᒻᒪᑦ, ᐊᒥᐊᒃᑯᖃᖕᖏᐸᑦ ᑮᓇᐅᔭᓂᒃ ᓯᕗᓪᓕᓂᑕᕐᒥ ᐊᖏᕐᑕᐅᒪᔪᒥ ISC ᐊᓪᓚᖁᑎᖓᓂ, ᓄᑖᖅ ᑐᑦᓯᕋᐅᑎᒃ ᒪᓂᔭᐅᒋᐊᓕᒃ, ᑖᑦᓱᒧᖓᑦᓭᓇᒨᓕᖓᒐᓗᐊᕐᐸᑦ ᐱᔾᔪᔨᒍᑎᒧᑦ ᐅᕝᕙᓘᓐᓃᑦ ᐱᖁᑎᒧᑦ.  ᐊᕐᕌᒍᑕᒫᑦ, ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᑎᑭᑕᐅᓲᖑᒋᐊᓖᑦ ᓄᑖᑦᓯᐊᒥᒃ ᐱᔭᕇᕐᓯᒪᔪᒥᒃ ᑐᑦᓯᕋᐅᑎᒥᒃ ᕿᒥᕐᕈᓂᖃᕐᓂᐊᕋᒥ ᐱᐊᕋᐅᑉ ᑭᖕᖒᒪᒋᔭᖓᓂᒃ, ᑖᒃᑯᐊ ᐱᕙᓪᓕᐊᑐᐃᓐᓇᕆᐊᖃᕐᒪᑕ ᓯᕗᓂᕐᒥᒃ.

 

ᐊ - ᐱᐊᕋᒐ ᑭᖕᖒᒪᑦᓯᐸᑦ ᑖᒃᑯᓂᖓᑦᓭᓇᖅ ᐱᔾᔪᔨᒍᑎᓂᒃ ᐊᕐᕌᒍᑕᒫᑦ, ᐊᑐᕈᓐᓇᖁᖔ ᑖᑦᓱᒥᖓᑦᓭᓇᖅ ᐅᓐᓂᑑᑎᐅᑦᓱᓂ ᐊᓪᓚᓯᒪᔪᒥᒃ ᐊᒥᓱᐃᓄᑦ ᐊᕐᕋᒍᓄᑦ?

ᑭ - ᐊᐅᑲ, ᓄᑖᖅ ᐅᓐᓂᑑᑎᐅᑦᓱᓂ ᐊᓪᓚᓯᒪᔪᖅ ᐱᔭᐅᒋᐊᓕᒃ ᐊᕐᕌᒍᑕᒫᑦ ᓱᓕᓂᕃᒍᑎᐅᓂᖓᕋᒥ ᑖᓐᓇ ᐱᔾᔪᔨᓂᖅ ᑭᖕᖒᒪᒋᔭᐅᓪᓚᕆᖏᓐᓇᒪᖔᑦ, ᑐᖕᖓᕕᒋᓗᒋᑦ ᐱᐊᕋᐅᑉ ᐊᓯᔾᔨᕙᓪᓕᐊᓂᕐᒧᑦ ᑭᖕᖒᒪᒋᔭᖏᑦ.  ᑌᒫᒃ ᓱᕐᖁᐃᓯᐊᕐᓂᖃᕐᒪᑦ ᐱᔾᔪᔨᓂᖅ ᐱᔭᐅᒋᐊᖃᓪᓚᕆᒻᒪᖔᑦ ᐱᐊᕋᐅᑉ ᑭᖕᖒᒪᒋᔭᖏᓐᓄᑦ ᒫᓐᓇ.

 

ᐊ - ᒪᓂᔨᒋᐊᖃᕐᖁᖔ ᑐᑦᓯᕋᐅᑎᒥᒃ ᐊᑐᓂ ᐱᐊᕋᕐᒧᑦ ᐃᓄᑑᓈᕐᑎᓗᒋᑦ?

ᑭ- ᐊᐅᑲ, ᐃᓚᐅᑎᑦᓯᒍᓐᓇᖁᑎᑦ ᐊᒥᓱᐃᓂᒃ ᐱᐊᕋᕐᓄᑦ ᑐᑦᓯᕋᐅᑎᒥᒃ ᐊᑐᕐᓗᑎᒃ ᖃᕆᑕᔭᑎᒍᑦ ᑐᑦᓯᕋᐅᑎᐅᒍᓐᓇᑐᖅ ᑕᑕᑦᓴᕋᑦᕋᔭᖅ (ᐃᓄᑐᐊᖅ, ᐃᒪᒌᑦ, ᐅᕝᕙᓘᓐᓃᑦ ᐊᒥᓱᐃᑦ). ᓱᕐᖁᐃᓯᐊᕆᑦ ᖃᐅᔨᒪᒍᑎᐅᒋᐊᓕᓐᓂᒃ ᐃᓚᐅᑎᑦᓯᓯᐊᕐᒪᖔᕐᐱᑦ ᐊᑐᓂ ᐱᐊᕋᕐᒨᓕᖓᔪᓂᒃ.

 

ᐃᓚᐅᒍᓐᓇᓂᕐᒧᑦ ᐃᓚᐅᔪᓄᓪᓘᓂᖓᔪᖅ

 

ᐊ - ᑭᓈ ᐱᕙᓪᓕᒍᓐᓇᖃ ᑕᕝᕙᖓᑦ ᐱᐊᕋᕐᓂᒃ ᓯᕗᓪᓕᐅᔨᓂᕐᒨᓕᖓᔪᒥᒃ?

ᑭ - ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐃᓕᖓᔪᖅ ᐃᓚᐅᔫᔪᑦ ᐱᐊᕋᕐᓄᑦ ᓄᓇᕕᒻᒥ.  ᐃᓚᒋᐊᕈᑎᒋᓗᒍ, ᑎᒥᐅᔫᔪᖅ ᐱᓇᓱᐊᕐᖃᑎᓖᑦ ᑖᒃᑯᓂᖓ ᐱᐊᕋᕐᓂᒃ, ᐅᑭᐅᓕᓐᓂᒃ 18 ᐊᑖᓂ, ᐱᕙᓪᓕᒍᓐᓇᒥᔪᐃᑦ ᑕᕝᕙᖓᑦ ᐱᒋᐊᕐᑎᑕᐅᒪᔪᒥ.  ᖃᐅᔨᒋᐊᓪᓚᒍᒪᒍᓂ ᑐᑦᓯᕋᐅᑏᑦ ᒥᑦᓴᓄᑦ ᑎᒥᐅᔫᔪᒧᑦ, ᖃᐅᔨᒋᐊᕐᕕᖃᕈᓐᓇᑐᖅ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐱᓇᓱᖃᑎᒌᑦᑐᖏᓐᓂᒃ.

 

ᐊ - ᐱᐊᕋᖅ ᐃᓚᐅᔫᔪᖅ ᓄᓇᕗᑦᒥ ᓄᓇᕕᒻᒥᐅᖑᓗᓂ.  ᒪᓂᔨᒍᓐᓇᖁᖔ ᑐᑦᓯᕋᐅᑎᒥᒃ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ-ᒧ?

ᑭ - ᐊᐅᑲ, ᒪᓂᔨᒋᐊᖃᕐᖁᑎᑦ ᑐᑦᓯᕋᐅᑎᓐᓂᒃ ᐅᕗᖓ ᔪᐊᑕᓐ ᑐᖕᖓᕕᖓᓅᓕᖓᔪᒧᑦ.  ᐱᓇᓱᐊᕋᔭᕐᑐᑦ ᑐᑦᓯᕋᐅᑎᓐᓂᒃ, ᑖᒃᑯᐊ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐱᓇᓱᖃᑎᒌᑦᑐᑦ ᑲᒪᒋᔭᑦᓴᔭᓖᑦ ᑐᑦᓯᕋᐅᑎᓂᑭᓯᐊᓂ ᐱᐊᕋᕐᓄᑦ ᐃᓚᐅᔫᔪᓄᑦ ᓄᓇᕕᒻᒥ.  ᖃᐅᔨᒋᐊᕐᕕᒋᒍᓐᓇᑕᑎᑦ ᐅᕗᖓ ᐊᓪᓚᓗᑎᑦ: principedejordan-qc-jordanprinciple@sac-isc.gc.ca.

ᐊ - ᐱᐊᕋᒐ ᐃᓚᔫᒍᑎᒥᒃ ᑭᓯᑦᓯᒍᑎᖃᖕᖏᑐᖅ.  ᒪᓂᔨᒍᓐᓇᖏᓐᓇᖁᖔ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ-ᒧ?

ᑭ - ᐋ, ᐱᐊᕋᖅ ᐃᓚᐅᔫᒍᑎᒥᒃ ᑭᓯᑦᓯᒍᑎᖃᖕᖏᐸᑦ, ᐊᑐᕈᓐᓇᖁᑎᑦ ᐊᖓᔪᕐᖄᖓᑕ ᑭᓯᑦᓯᒍᑎᖓᓂᒃ (ᐃᓚᐅᔫᒍᑎᒃ ᑭᓯᑦᓯᒍᑎᒃ ᐅᕝᕙᓘᓐᓃᑦ ᐃᐊᓐ ᑭᓯᑦᓯᒍᑎᒃ) ᒪᓂᔨᒍᑎᒋᓗᒍ ᑐᑦᓯᕋᐅᑎᒃ.

 

ᐊ - ᐱᐊᕋᒑ ᓄᓇᕕᒻᒥᐅᖑᒋᐊᓕᒃ ᐱᓚᓪᓕᓚᖓᒍᓂ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᑮᓇᐅᔭᖁᑎᖏᓐᓂᒃ?  

ᑭ - ᐊᐅᑲ, ᐱᐊᕃᑦ ᐃᓕᑕᕆᔭᐅᒍᑎᖃᑐᐃᓐᓇᕆᐊᓕᒃ ᓄᓇᕕᒻᒥ ᐃᓚᐅᔫᒋᐊᖓ ᐱᒍᓐᓇᓚᖓᒍᓂ, ᓇᑭᑐᐃᓐᓇ ᓇᓂᒥᐅᖑᒐᓗᐊᕈᓂ ᑳᓇᑕᒥ.

 

ᐊ - ᐱᐊᕋᒑ ᐱᕕᖃᖏᓐᓇᕋᔭᕐᖃ ᐅᑭᐅᕐᑖᑐᐊᕈᓂ ᐃᓄᒻᒪᕆᐅᓂᕋᕐᑕᐅᓂᕐᒧᑦ?

ᑭ - ᐱᐊᕃᑦ ᐅᑭᐅᕐᑖᕈᓂ ᐃᓄᒻᒪᕆᐅᓂᕋᕐᑕᐅᓂᕐᒧᑦ (18-ᓂᒃ ᐅᑭᐅᖃᖕᖏᐅᔪᑦ, ᓇᓂᒥᐅᖑᓂᖓ ᐃᑉᐱᒋᓗᒍ ᑳᓇᑕᒥ), ᐱᕐᖃᔦᒐᔭᕐᑐᑦ ᑖᑦᓱᒪ ᐊᑖᒍᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ, ᑲᒪᒋᔭᐅᒍᑎᕕᓂᖓ ᑌᒣᒃᑲᓗᐊᕐᐸ.  ᑐᑦᓯᕋᐅᑎᐅᑉᐸ ᐃᓄᒻᒧᑦ ᐅᑭᐅᓕᒻᒧᑦ ᐅᖓᑖᓄᑦ ᐃᓄᒻᒪᕆᐅᓂᕋᕐᑕᐅᓂᕐᒧᑦ, ᖃᐅᔨᒋᐊᕆᑦ contact your CLSC ᐊᓐᓂᐊᕕᓐᓄᑦ ᖃᐅᔨᒋᐊᕆᐊᓪᓚᒍᑎᒋᓗᒍ ᓱᓀᑦ ᐊᑐᐃᓐᓇᐅᒪᖔᑕ ᐱᔾᔪᔨᒍᑏᑦ ᐃᓕᖓᔪᑦ ᐃᓕᓐᓄᑦ.  

 

ᐊᔾᔨᒌᖕᖏᑐᑦ ᑐᑦᓯᕋᐅᑎᒍᓐᓇᑐᑦ ᒥᓕᒪᔪᕐᓗ ᐱᐅᒡᒍᑏᑦ/ᐱᔾᔪᔨᕕᑦ

ᐊ - ᓇᓪᓕᖐᑦ ᐱᐅᒃᑯᑏᑦ ᐅᕝᕙᓘᓐᓃᑦ ᐱᔾᔪᔨᒍᑏᑦ ᐃᓕᑕᕆᔭᐅᒍᓐᓇᖃᑦ ᑖᑦᓱᒪ ᐊᑖᒍᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ?

ᑭ - ᑮᓇᐅᔦᓕᕿᐅᑏᑦ ᑕᑯᓐᓇᑕᑐᐃᖃᑫᓐᓇᕆᐊᓖᑦ ᑭᖕᖑᒪᒍᑎᐅᓪᓚᕆᑦᑐᒥᒃ ᐊᑐᓂ ᐱᐊᕋᕐᒧᑦ, ᑖᓇ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐃᓱᒪᓂᖓ ᐊᔾᔨᒌᖕᖏᓂᖏᑦᑕ ᐊᑐᓂ ᐃᓄᑑᓈᕐᑎᑑᑉ ᖃᓄᐃᓕᖓᓂᖓᑕ.  ᐱᕕᖃᕐᑎᓯᑦᓱᑕ ᐊᕕᑦᑐᓯᒪᔪᓂᒃ ᐱᔾᔪᔨᒍᑎᓂᒃ ᐱᐅᒃᑯᑎᓂᓪᓗ, ᓇᓪᓕᑳᒐᑦᓭᑦ ᑖᒃᑯᓇᓂ ᐊᕕᑦᑐᓯᒪᔪᓂ ᑕᑯᑦᓴᐅᑎᑕᐅᔪᑦ ᒪᓕᒐᒋᔭᖏᓐᓂ.  ᐅᓐᓂᑑᔾᔨᕗᒍᑦ ᖃᐅᔨᒋᐊᕕᖃᕋᔭᕐᑎᓗᑎᑦ ᐅᕙᒃᑎᓂᒃ ᓇᓗᕐᖁᑎᒍᕕᑦ ᑕᒪᑦᓱᒧᖓ ᐃᓚᐅᒍᓐᓇᒪᖔᑦ ᐱᐅᒃᑯᑎᒧᑦ ᐱᔾᔪᔨᒍᑎᒧᓪᓘᓃᑦ.

 

ᐊ - ᐱᐊᕋᒐ ᐃᓚᐅᒍᒪᓂᓕᒃ ᐱᓪᓗᑯᑦᑐᑎᒎᕐᑐᒥᒃ.  ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐊᑭᓖᒍᓐᓇᖃ ᐊᑭᖏᓐᓂᒃ?

ᑭ - ᑮᓇᐅᔦᓕᕿᐅᑏᑦ ᑕᑯᓐᓇᑕᑐᐊᖃᑫᓐᓇᕆᐊᓖᑦ ᑭᖕᖒᒪᓇᕐᓂᖓᑕ ᐱᐊᕋᐅᑉ.  ᑖᓐᓇ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐃᓱᒪᓚᖓᒍᓂ ᐊᑭᓖᓂᕐᒥᒃ, ᐱᒻᒪᕆᕋᑕᖅ ᓇᓗᓀᕐᓯᓯᐊᒍᓐᓇᕆᐊᒥᒃ ᖃᓄᖅ ᑐᑦᓯᕋᐅᑎᐅᔪᖅ ᑮᓇᐅᔭᓂᒃ ᐃᓕᖓᓂᕃᒻᒪᖔᑦ ᐱᐊᕋᐅᑉ ᑭᖕᖑᒪᒍᑎᐅᓂᖓᓄᑦ ᑕᕝᕘᓇ ᓴᐳᒻᒥᒍᑏᑦ ᐊᓪᓚᓯᒪᔪᕐᑎᒍᑦ ᑐᑦᓯᕋᐅᑎᔪᓂ.

 

Q - ᐱᐊᕋᖅ ᐱᓪᓗᑯᑦᑐᑎᒍᑦ ᐱᔾᔪᔭᐅᒋᐊᖃᕐᐸᑦ ᐊᑐᐃᓐᓇᐅᖏᑦᑐᒥᒃ, ᑖᓐᓇ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐃᑲᔪᖁᓐᓇᖃ ᓇᕝᕚᓂᕐᒥᒃ ᐱᓕᓂᕐᒥᒃ ᐅᕝᕙᓘᓐᓃᑦ ᐃᓂᓪᓓᓗᓂ ᐱᔾᔪᔨᕕᒻᒥᒃ?  

A - ᑲᒪᒋᔭᑦᓴᔭᖓ ᑐᑦᓯᕋᐅᑎᓕᐅᕐᑑᑉ ᓇᕝᕚᒍᓐᓇᕆᐊᒥᒃ ᐱᓕᓂᕐᒥᒃ ᐋᕐᖀᓗᓂᓗ ᐱᔾᔪᔨᕕᒻᒥᒃ.  ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᑲᒪᕐᖃᔭᖕᖏᑐᖅ ᕿᓂᕐᓂᒥᒃ ᑖᒃᑯᓂᖓ ᐱᓕᓂᕐᓂᒃ ᐅᕝᕙᓘᓐᓃᑦ ᑎᒥᐅᔪᒥᒃ ᓇᓪᓕᖏᓐᓄᑦ ᐱᔾᔪᔨᕕᐅᒋᐊᓕᓐᓄᑦ.

 

Q - ᑖᓐᓈ ‘’ᐱᓕᓂᖅ ᐱᔾᔪᔨᕕᒃ” ᐊᕕᑦᑐᓯᒪᔪᒦᑦᑐᖅ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

A - ᑖᓐᓇ "ᐱᓕᓂᖅ ᐱᔾᔪᔨᕕᒃ" ᐊᕕᑦᑐᓯᒪᔪᒦᑦᑐᖅ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᓕᒃ ᐱᔾᔪᔨᕕᓐᓂᒃ ᐱᓕᓂᕐᓄᑦ ᐱᓇᓱᐊᕐᑕᐅᔪᓂᒃ, ᐃᓚᐅᔫᒐᓗᐊᕈᑎᒃ ᑎᒥᐅᕕᐅᔪᓄᑦ ᐱᓕᓂᕐᓄᑦ ᐅᕝᕙᓘᓐᓃᑦ ᐃᓚᐅᔫᖕᖏᑲᓗᐊᕈᑎᒃ, ᐆᑦᑑᑎᒋᓗᒋᑦ ᐃᓱᒪᓕᕆᔩᑦ, ᐅᖄᒋᖃᕐᓴᑎᑦᓯᔩᑦ, ᐱᓀᓗᑕᓕᓐᓂᒃ ᐃᓱᕐᔦᔩᑦ, ᐊᓯᖏᓐᓄᓗ.  ᐱᕕᑦᓴᖃᕐᒥᔪᑎᑦᑕᐅᖅ ᓇᓪᓕᑳᒍᓐᓇᓂᕐᒥᒃ "ᐊᓯᖏᑦ" ᑕᕝᕙᓂ "ᐱᓕᓂᖅ ᐱᔾᔪᔨᕕᒃ" ᐊᕕᑦᑐᓯᒪᔪᓂ ᑖᓐᓇ ᐱᔾᔪᔨᕕᐅᑉ ᑌᔭᐅᒍᓯᖓ ᐊᓪᓚᓯᒪᔪᓃᖕᖏᐸᑦ ᓇᓪᓕᑳᕝᕕᐅᔪᒥ ᐊᓪᓚᓯᒪᔪᒥ.

 

ᐊ - ᑖᓐᓈ "ᐱᖁᑎᒃ, ᐱᑦᓴᖅ, ᐱᐅᒡᒍᑎᒃ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ ᐊᕕᑦᑐᓯᒪᔪᒦᑦᑐᖅ ᐃᓗᓐᓇᓯᐊᖏᓐᓂᒃ ᐃᓗᓕᓕᒃ ᐱᐅᒃᑯᑎᓂᒃ ᑭᖕᖑᒪᒋᔭᐅᒐᔭᕐᑐᓂᒃ ᓴᐳᒻᒥᒍᑎᑦᓴᐅᓂᐊᕐᓗᑎᒃ ᐱᐊᕋᐅᑉ ᐱᕙᓪᓕᐊᓂᑦᓴᖓᓄᑦ, ᐃᓗᓯᕐᓱᓯᐊᕐᓂᖓᓄᑦ, ᖃᓄᐃᖕᖏᓯᐊᕐᓂᖓᓄᓪᓗ, ᐆᑦᑑᑎᒋᓗᒍ ᐋᕐᕿᒋᐊᕐᑕᐅᒪᔪᑦ ᐱᐅᒡᒍᑏᑦ, ᐃᑯᒪᒨᕐᑐᑦ ᐱᐅᒡᒍᑏᑦ, ᐋᓐᓂᐊᓯᐅᕐᓂᒧᑦ ᐱᐅᒡᒍᑏᑦ, ᐃᓪᓘᑉ ᐱᐅᒡᒍᑎᖏᑦ, ᐊᓯᖏᓪᓗ.  ᓇᓪᓕᑳᒐᑦᓴᖃᕐᒥᔪᑎᑦ ᓇᓗᓀᕐᓯᓂᕐᒥᒃ "ᐊᓯᐊᓂᒃ" ᑕᕝᕙᓂ "ᐱᖁᑎᒃ, ᐱᑦᓴᖅ, ᐱᐅᒡᒍᑎᒃ" ᐊᕕᑦᑐᓯᒪᔪᓂ ᑖᓐᓇ ᐱᔾᔪᔨᕕᐅᑉ ᑌᔭᐅᒍᓯᖓ ᐊᓪᓚᓯᒪᔪᓃᖕᖏᐸᑦ ᓇᓪᓕᑳᕝᕕᐅᔪᒥ ᐊᓪᓚᓯᒪᔪᒥ.

ᐊ – ᑖᓐᓈ "ᐊᐅᓚᓂᕕᓂᕐᒧᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ "ᐊᐅᓚᓂᕕᓂᕐᒧᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᒦᑦᑐᖅ ᖃᕆᑕᐅᔭᑎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᓕᒃ ᐊᑭᓖᒍᑎᕕᓂᓕᒫᓂᒃ ᐃᓕᖓᔪᓂᒃ ᐊᐅᓚᒍᑎᐅᒋᐊᖃᕐᓂᒨᓕᖓᔪᓕᒫᓂᒃ ᐱᒐᓱᐊᕐᓗᓂ ᑖᒃᑯᓂᖓ ᐱᔾᔪᔨᒍᑎᓂᒃ ᐅᕝᕙᓘᓐᓃᑦ ᖃᓄᐃᓘᕐᓂᐅᔪᓂᒃ ᓴᐳᒻᒥᓂᐊᕐᑐᓂᒃ ᑖᑦᓱᒥᖓ ᐱᐊᕋᕐᒥᒃ.  ᑖᒃᑯᐊ ᐃᓚᖃᑐᐃᓐᓇᕆᐊᓖᑦ ᓄᓇᒃᑰᔪᕐᓂᓂᒃ, ᖃᖓᑦᑕᐅᑎᓂᒃ, ᑐᔪᕐᒥᐅᒍᑎᓂᒃ, ᐊᓯᒋᐊᓪᓚᖏᓐᓂᓗ. ᐱᕕᑦᓴᖃᒋᐊᓪᓚᒥᔪᑎᑦ ᓇᓐᓕᑳᒋᒍᓐᓇᓂᕐᒥᒃ "ᐊᓯᖏᑦ" ᑕᕝᕙᓃᓪᓗᓂ "ᐊᐅᓚᓂᕐᒧᑦ ᑮᓇᐅᔭᕐᑐᓃᑦ" ᐊᕕᑦᑐᓯᒪᔪᓂ ᑖᓐᓇ ᐱᓪᓗᑯᓪᓗᓂ ᐱᕕᑦᓭᑦ ᐊᓪᓚᓯᒪᔪᓃᖕᖏᐸᑦ ᓇᓪᓕᑳᕝᕕᐅᔪᒥ ᐊᓪᓚᓯᒪᔪᒥ. 

 

ᐊ – ᑖᓐᓈ "ᐃᓕᓐᓂᐊᓂᕐᒨᓕᖓᔪᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ "ᐃᓕᓐᓂᐊᓂᕐᒨᓕᖓᔪᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᓱᓇᒦᔪᖅ ᐊᑭᓕᒫᖏᓐᓂᒃ ᐃᓚᓖᑦ ᑖᑦᓱᒧᖓ ᐱᐅᕋᐅᑉ ᐃᓕᓐᓂᐊᓂᖓᓄᑦ.  ᑖᓐᓇ ᐃᓚᖃᑐᐃᓐᓇᕆᐊᓕᒃ ᐃᑲᔪᕐᑕᐅᒍᑎᖏᓐᓅᓕᖓᔪᑦ ᐱᐊᕋᐅᑉ ᐃᓕᓐᓂᐊᓂᖓᓄᑦ, ᐃᓕᓐᓂᐊᕈᑎᑦᓴᔭᓄ, ᐃᓕᓐᓂᐊᕕᓕᐊᕐᓂᒧᑦ ᐊᐅᓚᒍᑎᓄᑦ, ᐃᓕᓐᓂᐊᑎᓂᒃ ᐃᑲᔪᕐᑎᐅᔪᓄᑦ, ᐃᓕᓐᓂᐊᑎᓪᓗᒋᓪᓗ ᐃᑲᔪᕐᓯᓃᑦ, ᐊᓯᒋᐊᓪᓚᖏᓐᓄᓗ. ᐱᕕᑦᓴᖃᓚᖓᒻᒥᔪᑎᑦ ᓇᓪᓕᑳᕆᓂᕐᒥᒃ "ᐊᓯᖏᑦ" ᑕᕝᕙᓂ "ᐃᓕᓐᓂᐊᓂᕐᒨᓕᖓᔪᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᑖᓐᓇ ᐱᓪᓗᑯᓪᓗᓂ ᐱᕕᑦᓭᑦ ᐊᓪᓚᓯᒪᔪᓃᖕᖏᐸᑦ ᓇᓪᓕᑳᕝᕕᐅᔪᒥ ᐊᓪᓚᓯᒪᔪᒥ.

ᐊ - ᑖᓐᓈ "ᒪᙯᕝᕖᑦ ᐱᐊᕋᓕᕆᓂᕐᒨᓕᖓᔪᓪᓗ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ "ᒪᙯᕝᕖᑦ ᐱᐊᕋᓕᕆᓂᕐᒨᓕᖓᔪᓪᓗ ᑮᓇᐅᔮᕐᑑᑏᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓚᓕᒃ ᑮᓇᐅᔭᕐᑑᑎᓂᒃ ᐃᓕᖓᔪᓂᒃ ᐱᐊᕋᐅᑉ ᐃᓚᐅᓂᖏᓐᓄᑦ ᒪᙯᕝᕕᓄᑦ—ᑖᒃᑯᐊᖑᒐᓗᐊᕐᐸᑕ ᐃᓕᓐᓂᐊᓂᓕᕆᓂᖅ, ᐱᖕᖑᐊᓂᓕᕆᓂᖅ, ᐅᕝᕙᓘᓐᓃᑦ ᐱᓪᓗᑯᒋᐊᓕᑦᑎᓅᓕᖓᔪᖅ—ᐊᒻᒪᓗᒋᐊᓪᓚᒃ ᐱᐊᕃᑦ ᑲᒪᒋᔭᐅᑦᓯᐊᓂᖏᓐᓄᑦ ᑮᓇᐅᔭᕐᑑᑎᓄᑦ ᑐᕌᖓᔪᓂᒃ ᐱᐊᕋᐅᑉ ᑭᖕᖒᒪᒋᔭᖏᓐᓅᓕᖓᔪᓄᑦ, ᑖᒃᑯᐊᓗ ᐱᐅᓯᕐᓱᑐᐃᑦ ᐱᐊᕃᑦ ᑲᒪᒋᔭᐅᑦᓯᐊᓂᖏᓐᓅᓕᖓᔪᓄᑦ ᐆᑦᑑᑎᒋᓗᒍ ᐯᕆᑦᓯᕕᒃ.  ᐱᕕᑦᓴᖃᒋᐊᓪᓚᒥᔪᑎᑦ ᓇᓗᓀᕐᓯᓗᑎᒃ "ᐊᓯᖏᑦ" ᑕᕝᕙᓂ "ᒪᙯᕝᕖᑦ ᐱᐊᕃ ᑲᒪᒋᔭᐅᑦᓯᐊᓂᖏᓐᓄ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᑖᓐᓇ ᐱᓪᓗᑯᓪᓗᓂ ᐱᕕᑦᓭᑦ ᐊᓪᓚᓯᒪᔪᓃᖕᖏᐸᑦ ᓇᓪᓕᑳᕝᕕᐅᔪᒥ ᐊᓪᓚᓯᒪᔪᒥ.

 

ᐊ - ᑖᓐᓈ "ᐃᓅᒐᓱᐊᕐᓂᒨᓕᖓᔪᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ "ᐃᓅᒐᓱᐊᕐᓂᒨᓕᖓᔪᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᓱᓇᒦᔪᑦ ᑮᓇᐅᔭᕐᑑᑎᐅᒋᐊᖃᓪᓚᕆᑦᑐᓂᒃ ᐃᓕᖓᔪᓂᒃ ᐱᐊᕋᐅᑉ ᖃᐅᑕᒫᑎᒍᑦ ᐃᓅᓯᖓᓅᓕᐊᔪᓂᒃ.  ᐃᓚᖃᑐᐃᓐᓇᕆᐊᓕᒃ ᑮᓇᐅᔭᕐᑑᑎᓂᒃ ᓂᕿᑎᒍᑦ ᐃᑲᔪᕐᓯᔭᐅᓂᕐᓂᒃ, ᐊᓂᕐᕋᖃᕐᓂᒧᑦ ᓴᐳᔾᔭᐅᓂᕐᒧᑦ, ᐊᓐᓄᕌᓄᑦ, ᐊᓯᖏᓐᓄᓗ ᑭᖕᖒᒪᒋᔭᐅᒍᓪᓕᐅᓲᓂᒃ ᐱᔭᐅᒋᐊᖃᓲᑦ ᖃᓄᐃᖕᖏᓯᐊᕆᐊᖃᕐᓂᖏᓐᓅᓕᖓᔪᓂᒃ ᐱᐊᕋᐅᑉ ᖃᓄᐃᖕᖏᓯᐊᕆᐊᖃᕐᓂᖓᓄᑦ, ᐱᓗᐊᕐᑐᒥᒃ ᖃᓄᐃᓕᖓᓂᖓ ᓴᐳᒻᒥᔭᐅᒋᐊᓪᓚᒋᐊᖃᕐᑐᖃᕐᐸᑦ.  ᐱᕕᑦᓴᖃᒋᐊᓪᓚᒥᔪᑎᑦ ᓇᓗᓀᕐᓯᓗᑎᒃ "ᐊᓯᖏᑦ" ᑕᕝᕙᓂ "ᐃᓅᒐᓱᐊᕐᓂᒨᓕᖓᔪᑦ ᑮᓇᐅᔭᕐᑑᑏᑦ" ᐊᕕᑦᑐᓯᒪᔪᓂ ᑖᓐᓇ ᐱᓪᓗᑯᓪᓗᓂ ᐱᕕᑦᓭᑦ ᐊᓪᓚᓯᒪᔪᓃᖕᖏᐸᑦ ᓇᓪᓕᑳᕝᕕᐅᔪᒥ ᐊᓪᓚᓯᒪᔪᒥ.

 

ᐊ - ᑖᓐᓈ "ᐱᖁᑎᒻᒪᕇᑦ ᓴᓇᔭᐅᒋᐊᓪᓚᓃᓪᓗ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ "ᐱᖁᑎᒻᒪᕇᑦ ᓴᓇᔭᐅᒋᐊᓪᓚᓃᓪᓗ” ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᓱᓇᒦᔪᑦ ᑮᓇᐅᔭᕐᑑᑎᓂᒃ ᐃᓕᖓᔪᓂᒃ ᓴᓇᔭᐅᒋᐊᓪᓛᐱᒋᐊᓕᓐᓄᑦ ᐅᕝᕙᓘᓐᓃᑦ ᐱᐅᒡᒍᑎᒻᒪᕇᑦ ᐃᓪᓗᒪᕇᑦ ᐋᕐᕿᒋᐊᕐᑕᐅᓂᖏᓐᓄᑦ ᑭᖕᖒᒪᒋᔭᐅᔪᓄᑦ ᐱᐊᕋᐅᑉ ᐱᓪᓗᑯᒋᐊᓕᑎᒍᑦ ᑭᖕᖒᒪᒋᔭᖏᓐᓄᑦ. ᐱᕕᑦᓴᖃᒋᐊᓪᓚᒥᔪᑎᑦ ᓇᓗᓀᕐᓯᓗᑎᒃ "ᐊᓯᖏᑦ" ᑕᕝᕙᓂ ""ᐱᖁᑎᒻᒪᕇᑦ ᓴᓇᔭᐅᒋᐊᓪᓚᓃᓪᓗ" ᐊᕕᑦᑐᓯᒪᔪᓂ ᑖᓐᓇ ᐱᓪᓗᑯᓪᓗᓂ ᐱᕕᑦᓭᑦ ᐊᓪᓚᓯᒪᔪᓃᖕᖏᐸᑦ ᓇᓪᓕᑳᕝᕕᐅᔪᒥ ᐊᓪᓚᓯᒪᔪᒥ.

 

ᐊ - ᑖᓐᓈ "ᓄᓇᒃᑰᔫᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ "ᓄᓇᒃᑰᔫᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓚᓕᒃ ᑮᓇᐅᔭᕐᑑᑎᕕᓂᕐᓂᒃ ᐃᓕᖓᔪᓂᒃ ᓂᐅᕕᕈᑎᕕᓂᕐᓄᑦ ᐅᕝᕙᓘᓐᓃᑦ ᐋᕐᕿᒋᐊᕈᑎᕕᓂᕐᓄᑦ ᓄᓇᒃᑰᔫᑦ ᐱᐊᕋᐅᑉ ᑭᖕᖒᒪᒋᔭᖏᓐᓅᓕᖓᔪᓂᒃ.  ᐃᓚᐅᑐᐃᓐᓇᕆᐊᓖᑦ ᐋᕐᕿᒋᐊᕐᓯᒪᔪᑦ ᓄᓇᒃᑰᔫᑦ ᐃᓄᑑᓈᕐᑎᑐᓄᑦ ᑎᒥᒥᒍᑦ ᐱᕐᖃᔭᑦᓯᐊᖏᑦᑐᓄᑦ ᐱᓪᓗᑯᑦᑐᑎᒍᓪᓗ ᐋᕐᕿᒋᐊᕐᓯᒪᔪᓄᑦ ᐆᑦᑑᑎᒋᓗᒋᑦ ᐊᑦᓴᓗᐊᓕᕐᓄᑦ ᒪᔫᑏᑦ ᐅᕝᕙᓘᓐᓃᑦ ᐊᑐᕐᑕᐅᒍᓐᓇᑐᓕᐊᖑᓯᒪᔪᑦ ᑌᒫᒃ ᐱᐊᕋᐅᑉ ᐊᑦᑕᓇᕐᑐᒦᑦᑌᓕᓂᕐᑎᒍᑦ ᐅᓯᔭᐅᒍᓐᓇᖃᑦᑕᓂᐊᕐᒪᑕ.

 

ᐊ - ᑖᓐᓈ "ᖃᓄᐃᖕᖏᓯᐊᕐᓂᑎᒍᑦ ᓱᖃᑦᓯᑎᑦᓯᓃᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓗᓕᖃᕐᖃ?

ᑭ - ᑖᓐᓇ "ᖃᓄᐃᖕᖏᓯᐊᕐᓂᑎᒍᑦ ᓱᖃᑦᓯᑎᑦᓯᓃᑦ" ᐊᕕᑦᑐᓯᒪᔪᓂ ᖃᕆᑕᐅᔭᑎᒎᕐᑐᖅ ᑕᑕᕐᓴᒐᑦᓴᔭᖅ ᐃᓚᓕᒃ ᑮᓇᐅᔭᕐᑑᑎᕕᓂᕐᓂᒃ ᐃᓕᖓᔪᓂᒃ ᓱᖁᑦᓯᓂᕕᓂᕐᓄᑦ ᑲᔪᖏᕐᓭᓂᕐᒧᑦ ᐱᐊᕋᐅᑉ ᑎᒥᒥᒍᑦ, ᐃᓱᒪᖓᒍᑦ, ᐃᑉᐱᓂᐊᕐᓂᖓᑕᓗ ᖃᓄᐃᖕᖏᓯᐊᕐᓂᖓᓄᑦ.  ᓱᓇᒦᑐᐃᓐᓇᕆᐊᓕᒃ ᐊᑭᖏᑦᑕ ᐱᖕᖑᓂᕐᓅᓕᖓᔪᓂᒃ, ᐃᙯᓕᓴᕐᓂᑎᒍᓪᓗ ᐃᓕᓐᓂᐊᓂᕐᓄᑦ, ᓇᒻᒥᓂᕐᓗ-ᐱᕙᓪᓕᐊᑎᑦᓯᓂᕐᒧ ᑲᑎᒪᓂᐊᕈᓯᐊᒥᓐᓂᒃ, ᐊᓯᖏᓐᓂᓗ ᐱᒋᐊᕐᑎᑕᐅᓯᒪᔪᓂᒃ ᐃᓕᖓᔪᓕᐊᖑᓯᒪᔪᓄᑦ ᐱᐊᕋᐅᑉ ᐱᓪᓗᑯᑦᑐᑭᒍᑦ ᑭᖕᖑᒪᒋᔭᖏᓐᓄᑦ.

 

ᐊ - ᑌᒪ ᑐᑦᓯᕋᕐᓂᕈᒪ ᓱᓇᒥᒃ/ᐱᖁᑎᒥᒃ, ᒪᓕᒐᓪᓗᑯᐊᐱᖃᕐᖄ ᒪᓕᒋᐊᓕᓐᓂᒃ?

ᑭ - ᐋ, ᑐᑦᓯᕃᕕᔪᖃᓕᕐᐸᑦ ᐱᖁᑎᒥᒃ, ᐱᐅᒡᒍᑎᒥᒃ, ᐅᕝᕙᓘᓐᓃᑦ ᐃᖁᑎᒥᒃ, ᓱᕐᖁᐃᓯᐊᒻᒪᕆᒋᐊᓕᒃ ᑖᓐᓇ ᐱᖁᑎᒃ ᓈᒻᒪᓈᑦᓯᐊᕋᓗᐊᕐᒪᖔᑦ ᐊᑑᑎᔭᐅᒋᐊᖃᓲᓂᒃ ᒪᓕᓪᓗᓂ ᐊᒻᒪᓗ ᐊᑭᑐᔭᐅᖕᖏᑑᓗᓂ.  ᑖᒃᑯᐊ ᐱᖁᑏᑦ ᓈᒻᒪᓈᕆᐊᓖᑦ ᑖᑦᓱᒧᖓ ᐱᐊᕋᐅᑉ ᑭᖕᖒᒪᒋᔭᖏᓐᓄᑦ ᒪᓕᑦᓯᐊᓗᓂᓗ ᐱᑦᓴᔭᕆᒋᐊᓕᖓᓄᑦ ᐱᐊᕋᐅᑉ.

ᐊᑮᑦ ᐅᑎᕐᕕᐅᒍᑏᓪᓗ

ᐊ - ᐊᑭᓖᕇᕐᓯᒪᓕᕐᖁᖓ ᑖᑦᓱᒧᖓ ᐅᓐᓂᑑᑎᐅᓯᒪᔪᓄᑦ ᐱᔾᔪᔨᒍᑎᓄᑦ ᐱᐊᕋᕐᒨᓕᖓᔪᒧᑦ.  ᐅᑎᕐᕕᐅᒍᓐᓇᖁᖔ?

ᑭ - ᓇᓪᓕᑐᐃᓐᓇᖏᓐᓄ ᐱᔾᔪᔨᒍᑎᓄᑦ ᐱᕕᐅᔪᕕᓂᕐᓄᑦ ᐅᕝᕙᓘᓐᓃᑦ ᐱᖁᑏᑦ ᓂᐅᕕᕐᑕᐅᒌᕐᑐᕕᓂᕐᓄᑦ, ᖃᐅᔨᒪᔭᐅᑦᓯᐊᓕ ᑮᓇᐅᔦᓕᕿᐅᑎᓪᓚᕆᒃ ᑐᑦᓯᕋᐅᑎᐅᒋᐊᓕᒃ ᑖᒃᑯᓄᖓ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃᒧᑦ ᐊᖏᕐᑕᐅᓂᐊᑐᐊᕈᓂ ᐱᔾᔪᔨᒍᑎᕕᓂᕐᓄᑦ ᐅᕝᕙᓘᓐᓃᑦ ᑖᑦᓱᒧᖓ ᐱᐅᒃᑯᑎᐅᔪᒧᑦ ᐅᖄᔭᐅᔪᒧᑦ.  ᑌᒪ ᐊᖏᕐᑕᐅᓂᖃᑦᓯᐊᓯᒪᓕᕐᐸᑦ ᓄᓇᓕᑐᖃᑦᓴᔦᑦ ᐱᔾᔪᔨᕕᖏᑦᑕ ᑳᓇᑕᒥ, ᐱᔪᓐᓇᓯᓯᒐᔭᕐᖁᑎᑦ ᐊᑭᓕᕐᑕᐅᒍᒪᓂᕐᒧᑦ ᑐᑦᓯᕋᐅᑎᑎᑦ. 

 

ᐊ - ᑖᓐᓇ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒻᒥ ᑮᓇᐅᔭᕐᑑᑎᐅᒌᕐᓯᒪᔪᓂᒃ ᐅᑎᕐᑎᓯᓂᖃᒍᓐᓇᖃ ᐱᔾᔪᔨᒍᑎᕕᓂᕐᓄᑦ ᐅᕝᕙᓘᓐᓃᑦ ᐱᖁᑎᓄᑦ?

ᑭ - ᐋ, ᑖᓐᓇ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᑮᓇᐅᔭᕐᑑᑎᐅᒌᕐᓯᒪᔪᓂᒃ ᐅᑎᕐᑎᓯᒍᓐᓇᑐᖅ ᑮᓇᐅᔭᕐᑑᑎᕕᓂᕐᓂᒃ ᑌᒪᖕᖓᓂᓂ ᔫᓂ 19, 2018.  ᓱᕐᖁᐃᓯᒍᒪᒧᑦ ᑐᑦᓯᕋᐅᑏᑦ ᐱᕕᖃᕐᒪᖔᑦ, ᓱᓇᒥᑦᓯᐊᑐᓂᒃ ᐊᓪᓚᖁᑎᐅᒋᐊᓕᓕᒫᑦᓯᐊᓂᒃ ᐋᑦᓯᓯᒪᒋᐊᓕᒃ, ᐃᓚᐅᑎᓪᓗᒍ ᐅᓐᓂᑑᑎᐅᔪᑦ ᐊᓪᓚᓯᒪᔪᖅ ᐊᖏᕐᓂᕃᔪᖅ ᑭᖕᖒᒪᒋᔭᐅᒋᐊᖓ ᐱᔾᔪᔨᓂᐅᒋᐊᖃᕐᓯᒪᔪᖅ ᒪᓕᑦᑎᓗᒋᓪᓗ ᐊᑭᓖᒍᑎᕕᓃᑦ.

 

ᐊ - ᖃᓄᓪᓗᐊᑎᒌ ᐅᑎᕐᕕᐅᒐᓱᒐᔭᕐᑐᖅ?

ᑭ - ᖃᓄᓪᓗᐊᑎᒋᐅᖓ ᐅᑎᕐᕕᐅᒐᓱᐊᕐᓂᒧᑦ ᑖᑦᓱᒪᖕᖓᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃᒥ ᒪᕐᕈᕙᓪᓘᓂᒃ ᐱᖓᓱᕙᓪᓗᓂᓪᓘᓃᑦ ᐱᓇᓱᓐᓇᐅᔪᓂ ᐱᓇᓱᐊᕈᓯᕐᑐᓲᑦ.  ᐱᔭᕇᕐᑕᐅᓯᒪᓂᕆᒋᐊᓕᖓ ᐊᑭᓖᓂᕐᒧᑦ ᖄᖏᐅᑎᑉᐸᑦ ᖃᐅᔨᒋᐊᕐᕕᖃᕈᓐᓇᑐᖅ ᑖᑦᓱᒪᖑ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒻᒥ ᑮᓇᐅᔭᓕᕆᔨᖏᓐᓄᑦ ᖃᐅᔨᒋᐊᒋᐊᓪᓚᒍᒪᒍᓂ. ᐱᔾᔪᑎᒋᓗᒍ ᐅᑎᕐᕕᐅᒍᒪᐅᑏᑦ ᐊᑖᒎᕐᑐᑦ ᓄᓇᓕᑐᖃᑦᓴᔦᑦ ᐱᔾᔪᔨ[ᖏᑦᑕ ᑳᓇᑕᒥ (ISC), ᐊᐅᓚᑦᓯᒋᐊᓪᓚᕕᖃᖕᖏᑐᒍᑦ ᖃᓄᓪᓗᐊᑎᒋᐅᓂᖏᓐᓂᒃ, ᐊᔾᔨᒌᖕᖏᑑᒍᓐᓇᑐᐃᑦ.  ᐅᑎᕐᕕᐅᒍᑎᒋᒋᐊᓖᑦ ᑐᖕᖓᕕᖃᕐᐸᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃᑯᓐᓂᒃ, ᑲᔪᖏᕐᓭᕗᒍᑦ ᐃᓕᓐᓂᒃ ᖃᐅᔨᒋᐊᕕᖃᒍᓐᓇᓂᕐᒥᒃ ᑐᕃᓐᓇᓗᑎᑦ.  ᑐᖕᖓᕕᖓ ᔪᐊᑕᓐ / ᔪᐊᑕᓐ ᑐᖕᖓᕕᖓ <principedejordan-qc-jordanprinciple@sac-isc.gc.ca>

 

ᐊ - ᓱᓀᓂᒃᑯᐊ ᐊᑭᓕᓂᑦᓭᑦ ᐱᓕᓂᐅᓂᕐᓄᑦ ᐱᔾᔪᔨᒍᑏᑦ ᐊᑭᓖᑦᓴᐅᑎᒋᖕᖏᑐᐊᕈᒪ ᐊᑭᓕᐅᑎᒋᒋᐊᓕᓐᓄᑦ?

ᑭ - ᐊᑭᓖᑦᓴᐅᑎᒋᕐᖃᔭᖕᖏᑐᐊᕈᕕᑦ, ᐊᐱᕆᒍᓐᓇᖁᑎᑦ ᐱᔾᔪᔨᕕᒻᒧᑦ ᒪᓂᔨᒍᒪᒐᔭᕐᒪᖔᑕ ᑮᓇᐅᔭᓂᒃ ᑐᑦᓯᕋᐅᑎᓂᒃ, ᐃᓚᐅᑎᓪᓗᒍ ᐊᑭᓖᑎᑦᓯᒍᑏᑦ, ᑐᕃᓐᓇᕕᒋᓗᒍ ᓄᓇᓕᑐᖃᑦᓴᔦᑦ ᐱᔾᔪᔨᕕᖓᑕ ᑳᓇᑕᒥ (ISC) ᐅᕝᕙᓘᓐᓃᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃᒥ, ᐊᑭᓖᑲᐱᒋᐊᑐᖕᖏᑑᓗᑎᑦ ᓯᕗᓂᐊᒍᑦ.

ᐊᐅᓚᑦᓯᓂᖅ ᐃᓂᓪᓚᓯᒪᓂᖓᓗ ᑐᑦᓯᕋᐅᑎᓅᓕᖓᔪᑦ

ᐊ - ᓱᒐᒦᑦ ᒪᓂᔨᒋᐊᖃᑦᓴᓕᕆᕗᖓ ᑐᑦᓯᕋᐅᑎᒃᑲᓂᒃ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒻᒥ ᑖᓐᓇᐅᖔᖕᖏᑎᓪᓗᖑ ᔪᐊᑕᓇᐅᑉ ᑐᖕᖓᕕᖓᑕᒨᓕᖓᔪᒧᑦ?

ᑭ - ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ (CFI) ᓄᐃᑕᐅᓯᒪᔪᖅ 2018-ᖑᑎᓪᓗᒍ ᓵᖕᖓᒐᔭᕐᓗᒍ ᑭᖕᖒᒪᓇᓪᓗᑐᕐᓂᕆᔭᖏᓐᓄᑦ ᐃᓄᐃᑦ ᐱᐊᕋᖏᑦᑕ.   ᓯᐊᕈᒋᐊᒥ ᑲᒪᒋᔭᑦᓴᔭᖏᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐊᓯᔾᔨᐅᒥᓯᒪᓕᕐᑐᑦ, ᒫᓐᓇᐅᓕᕐᑐᓗ ᑲᒪᒋᔭᑦᓴᔭᖃᓕᕐᑐᒍᑦ ᐃᓗᓐᓇᓯᐊᖏᓐᓂᒃ ᑐᑦᓯᕋᐅᑎᐅᔪᓂᒃ ᐱᐊᕋᕐᓄ ᐃᓚᐅᔫᔪᓄᑦ ᓄᓇᕕᒻᒥ, ᑖᓐᓇ ᔪᐊᑕᓐ ᑐᖕᖓᕕᖓᓅᓕᖓᔪᖅ ᐃᓕᖓᔫᓕᕐᑐᖅ ᐊᓪᓚᓄᑭᓯᐊᓂ. ᑌᒣᒻᒪᑦ, ᑐᑦᓯᕋᐅᑎᑎᑦ ᒪᓂᔭᐅᒋᐊᓖᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃᒧᑦ, ᑖᑦᓱᒧᖓᐅᖕᖏᑐᖅ ᔪᐊᑕᓐ ᑐᖕᖓᕕᖓᓅᓕᖓᔪᒧᑦ.  ᑖᓐᓇ ᐊᓯᔾᔨᓂᖅ ᐱᕕᑦᓴᖃᑎᑦᓯᓚᖓᔪᖅ ᐃᓕᖓᓂᕐᓴᐅᓂᐊᕐᒪᑕ ᐱᔾᔪᔨᒍᑏᑦ ᑭᖕᖒᒪᒋᓂᕐᓴᕆᔭᖏᓐᓄᑦ ᐃᓄᐃᑦ ᐃᓚᒌᖑᔪᐃᑦ ᐃᓚᐅᔫᑦᓱᑎᓪᓗ ᓄᓇᕕᒻᒥ. 

 

ᐊ - ᓱᓀᓐᓈ ᐊᔾᔨᒌᖕᖏᓂᖓ ᔪᐊᑕᓐ ᑐᖕᖓᕕᒐᓅᓕᖓᔪᖅ ᑖᑦᓱᒪᐅᓪᓗ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃᓗ (CFI)?

ᑭ - ᑕᒪᒋᒃ ᔪᐊᑕᓐ ᑐᖕᖓᕕᖓᓅᓕᖓᔪᖅ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃᓗ (CFI) ᑐᕌᕐᑑᒃ ᓱᕐᖁᐃᓯᐊᓂᒥᒃ ᐊᓪᓓᑦ ᐃᓄᐃᓪᓗ ᐱᐊᕋᖏᑦ ᐱᓂᕆᒐᔭᕐᑕᖏᓐᓂᒃ ᐱᔾᔪᔨᒍᑎᓂᒃ ᑭᖕᖒᒪᒋᔭᒥᓂᒃ, ᑭᓯᐊᓂ ᐊᔾᔨᒌᖕᖏᓂᓖᒃ ᐃᓗᓕᖏᑦ ᐱᒋᐊᕐᓂᕆᓲᒋᓪᓗ.  ᔪᐊᑕᓐ ᑐᖕᖓᕕᖓᓅᓕᖓᔪᖅ ᐃᓕᖓᓪᓚᕆᑦᑐᖅ ᐊᓪᓓᑦ ᐱᐊᕋᖏᓐᓄᑦ, ᑖᓐᓇ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᐃᓂᓪᓚᑕᐅᒻᒪᓪᓚᕆᑦᑎᓗᒍᑦ ᐃᓄᐃᑦ ᐱᐊᕋᖏᓐᓄᑦ.

 

ᐊ - ᖃᓄᐃᓐᓈ ᖃᐅᔨᒋᐊᕐᕕᖃᕈᓐᓇᖁᖓ ᑖᒃᑯᓂᖓ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐱᓇᓱᐊᖃᑎᒌᑦᑐᑯᖏᓐᓂᒃ?

ᑭ -  ᖃᐅᔨᒋᐊᕐᕕᒋᒍᓐᓇᑌᑦ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᐱᓇᓱᐊᖃᑎᒌᑦᑐᑯᖏᑦ ᒪᑯᓅᓇ:

 

ᐊ – ᓱᒐᒦᑦ ᐱᐊᕋᕐᒥᒃ ᓯᕗᓪᓕᐅᔨᓂᖅ ᓄᓇᕕᒃ ᐃᓱᒪᒋᔭᐅᑦᓴᕆᕙ ᑭᖑᓪᓕᐸᐅᓗᓂ ᐊᑭᓖᔨᐅᒋᐊᖓ?  ᓱᒐᒦ ᓱᓕᓂᕃᒍᑎᒥᒃ ᐊᓯᖃᖕᖏᒋᐊᖓ ᑮᓇᐅᔭᕐᑖᕕᐅᒍᓐᓇᑐᒥᒃ ᐊᑐᐃᓐᓇᖃᖕᖏᓂᕃᒍᑎᒥᒃ ᓄᐃᑦᓯᒋᐊᖃᑦᓴᕆᕕᑕ?

ᑭ - ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ (CFI) ᐊᑑᑎᓂᖃᓲᖅ ᑭᖑᓪᓕᐸᐅᓗᓂ ᐊᑭᓖᔨᐅᓗᓂ ᓱᕐᖁᐃᓯᐊᕈᒪᒧᑦ ᑖᒃᑯᐊ ᐱᑦᓭᑦ ᐊᑐᕐᑕᐅᓯᐊᖃᑦᑕᖁᒧᑦ ᑐᕌᕐᓂᖃᑦᓯᐊᓗᑎᓪᓗ ᐊᑐᕐᕕᒋᒋᐊᓕᒻᒥᓄᑦ ᑭᖕᖒᒪᒋᔭᐅᔪᓄᑦ ᑲᒪᒋᔭᐅᒍᓐᓇᖏᑦᑐᓄᑦ ᐊᓯᖏᓐᓄᑦ ᐱᓇᓱᐊᕐᕕᐅᔪᓄᑦ ᐅᕝᕙᓘᓐᓃᑦ ᑮᓇᐅᔭᕐᑖᕕᐅᓲᓄᑦ. ᑌᒪ ᑐᑭᓕᒃ ᑐᑭᑦᓯᕃᕕᖃᓚᐅᕋᓂ ᑮᓇᐅᔭᓂᒃ ᑕᕝᕙᖓᑦ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃᒥᒃ, ᓱᕐᖁᐃᓯᓪᓚᕆᒋᐊᓕᒃ ᑖᒃᑯᐊ ᑮᓇᐅᔦᑦ ᐊᑐᐃᓐᓇᐅᒪᖔᑕ ᐊᓯᖏᓐᓂᒃ ᐱᓯᒪᓗᑎᒃ ᑎᒥᐅᔪᓂᒃ ᐅᕝᕙᓘᓐᓃᑦ ᐱᓇᓱᐊᕐᓂᐅᓲᓂᒃ.  ᑖᓐᓇ ᐊᑑᑎᒋᐊᕈᓯᒃ ᐱᕕᑦᓴᖃᕐᑎᓯᔪᖅ ᑖᑦᓱᒥᖓ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᑕᑯᓐᓇᑕᑐᐃᖃᑫᓐᓇᓂᐊᕐᑎᓗᒍ ᖃᓄᐃᓕᖓᓂᐅᔪᓂᒃ ᑮᓇᐅᔭᑎᒍᑦ ᐃᑲᔪᕐᑕᐅᕕᖃᖕᖏᑐᓂᒃ ᐊᑐᐃᓐᓇᖃᕐᑎᓯᒍᓐᓇᓂᕐᒥᒃ, ᓱᕐᖁᐃᓯᐊᕈᒪᒧᑦ ᐱᐊᕃᑦ ᐃᓚᐅᔫᔪᑦ ᓄᓇᕕᒻᒥ ᐱᖃᑦᑕᓂᐊᕐᑎᓗᒋᑦ ᑖᒃᑯᓂᖓ ᐱᔾᔪᔨᒍᑎᐅᓪᓚᕆᒋᐊᓕᓐᓂᒃ ᑭᖕᖒᒪᒋᔭᖏᑦ ᐊᓯᖏᑦ ᓇᓪᓕᑳᒐᑦᓴᐅᔪᑦ ᐊᑐᐃᓐᓇᐅᒍᓐᓀᐸᑕ.

 

ᓇᒻᒥᓂᕐᒧᐊᓕᖓᔪᖅ-ᓄᐊᑕᐅᒪᔪᑦ ᓴᐳᒻᒥᔭᐅᓂᖏᑦ (ᐱᖁᔭᖅ 25)

ᐊ - ᖃᓄᐃᓐᓈ ᐱᒋᐊᕐᑎᓯᓂᖅ ᓴᐳᒻᒥᕙ ᓇᒻᒥᓂᕐᒧᐊᖓᔪᓂᒃ ᑐᓴᕐᕋᑦᓴᐅᔪᓂᒃ ᓄᐃᑎᑕᐅᔪᓂᒃ ᑕᕝᕙᓂ ᑐᑦᓯᕋᐅᑎᐅᔪᓂ?

ᑭ - ᓄᓇᕕᒻᒥ ᐃᓗᓯᓕᕆᔨᒻᒪᕆᒃᑯᑦ ᓄᓇᓕᑐᖃᑦᓴᔦᓪᓗ ᐱᔾᔪᔨᕕᖏᑦ ᑳᓇᑕᒥ (ISC) ᐊᑑᑎᓂᖃᕆᐊᓖᑦ ᒪᓕᒍᓐᓇᕆᐊᒥᒃ ᑖᒃᑯᓂᖓᓕᒫᖅ ᐃᕐᐸᑎᒋᐊᖃᕐᖏᓂᕐᒧᑦ ᒪᓕᒐᕐᓂᒃ, ᐃᓚᐅᑎᓪᓗᒍ ᒪᓕᒐᖅ 25. ᓇᒻᒥᓂᕐᒧᐊᖓᔪᖅ ᑐᓴᕐᑕᐅᔪᑦᓴᔭᖅ ᒪᓂᔭᐅᒪᔪᖅ ᑖᑦᓱᒧᖓ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᓴᐳᒻᒥᔭᐅᔪᖅ ᑖᑦᓱᒧᖓ ᒪᓕᒐᕐᒧᑦ.  ᐱᔪᓐᓇᐅᑎᖃᕐᖁᑎᑦ ᐱᕕᑦᓴᖃᕆᐊᒥᒃ ᓇᒻᒥᓂᑎᓐᓂᒃ ᑐᓴᕋᑦᓴᐅᔪᓂᒃ, ᐋᕐᕿᓱᕐᓗᒋᑦ, ᓱᕐᖁᐃᓯᐊᕐᓗᒋᓪᓗ ᓴᐳᒻᒥᔭᐅᓂᖓ.  ᐅᑉᐱᕆᔭᖃᑐᐊᕈᕕᑦ ᓇᒻᒥᓂᕐᓅᓕᖓᔪᖅ ᑐᓴᕋᕐᓭᑦ ᑲᒪᒋᔭᐅᑦᓯᐊᓯᒪᖕᖏᐸᑦ, ᐅᓐᓂᓗᒍᓐᓇᕕᖃᕐᖁᑎᑦ ᑕᒃᑰᓇ ᓇᒻᒥᓂᕐᒧᐊᖓᓂᕐᒧᑦ ᑲᒥᓴᓇᖓ ᑳᓇᑕᒥᒃ.  

 

ᑐᑭᑖᕐᑕᐅᔪᕕᓂᕐᒥᒃ ᐊᑭᓴᕐᑐᓂᖅ ᐱᓕᐅᒥᓂᕐᒧᓗ ᖃᓄᐃᓘᕐᓂᖅ

ᐊ- ᓱᓀᓐᓈ ᐱᔪᓐᓇᐅᑎᒋᔭᖅ ᑐᑭᑖᕐᑕᐅᔪᕕᓂᕐᒥᒃ ᐊᑭᓴᕐᑐᓂᖅ ᑐᑭᑖᕐᓂᒥᒃ?

ᑭ - ᐱᒐᓱᐊᕐᑐᐃᑦ ᐱᔪᓐᓇᐅᑎᓖᑦ ᑐᑭᑖᕐᑕᐅᔪᕕᓂᖅ ᐊᑭᓴᕐᑐᓂᕐᒥᒃ ᑐᑭᑖᕐᑕᐅᕕᓂᖅ.  ᑖᓐᓇ ᐱᓂᐊᕐᓂᒃ ᑐᓴᕐᑎᓯᑎᑕᐅᒍᑎᐅᔪᖅ ᑖᑦᓱᒧᖓ ᐱᒐᓱᐊᕐᑐᒧᑦ ᓄᐃᑦᓯᒍᑎᐅᔪᒧᑦ, ᐱᓗᐊᕐᑐᒥᒃ ᐊᖏᕐᑕᐅᓂᕐᒥ ᐅᕝᕙᓘᓐᓃᑦ ᐊᖏᕐᑕᐅᓂᕐᒥᓘᓐᓃᑦ ᐊᓪᓚᓯᒪᔪᒥ ᑕᕝᕙᖓᑦ ᑳᓇᑕᓕᒫᑎᒍᑦ ᓄᓇᓕᑐᖃᑦᓴᔦᑦ ᐱᔾᔪᔨᕕᖓᑕ ᑳᓇᑕᒥ (ISC). ᑐᑦᓯᕋᐅᑎᒃ ᐊᖏᕐᑕᐅᓂᖕᖏᐸᑦ, ᑐᑦᓯᕋᕐᑐᖅ ᑐᑭᑖᕐᑕᐅᔪᕕᓂᕐᒥᒃ ᐊᑭᓴᕐᑐᒍᓐᓇᑐᖅ ᐊᕐᕌᒎᑉ ᐊᑕᐅᓯᐅᑉ ᐃᓗᐊᓂ ᐊᖏᕐᑕᐅᖏᓐᓂᕕᓂᖓᑕ ᐅᓪᓘᑉ.  ᑌᒣᓕᒍᓐᓇᓂᕐᒦᒍᓂ, ᑐᑦᓯᕋᕐᑐᖅ ᒪᓂᔨᒋᐊᓕᒃ ᐊᑭᓴᕐᑐᓂᕐᒥᓂᒃ ᐊᓪᓚᓯᒪᔪᕐᑎᒍᑦ ᐊᐅᓪᓚᑎᑦᓯᓗᓂᓗ ᑖᑦᓱᒥᖓ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᑯᐯᒃ ᓄᓇᓕᓕᒫᑎᒍᑦ ᐊᓪᓚᕕᖓᓂ ᐅᕗᖓ ᓯᓚᑎᑦᓴᖓᓄᑦ: principedejordan-qc-jordanprinciple@sac-isc.gc.ca.

 

ᐊ - ᓱᓀᓐᓈ ᐳᕐᑐᓯᓕᐅᒦᓂᕐᒨᓕᖓᔪᖅ?

ᑭ - ᑖᓐᓇ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᐅᓐᓂᑑᔾᔨᖏᑐᐊᒪᑦ ᑮᓇᐅᔭᓂᒃ ᑐᑦᓯᕋᕐᑐᓗ ᐱᕕᖃᒍᒪᒍᓂ ᑲᔪᓯᓂᕐᒥᒃ ᑐᑦᓯᕋᐅᑎᒥᓂᒃ, ᑖᓐᓇ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᐋᑦᓯᓲᖅ ᐅᓐᓂᑑᑎᒥᓂᒃ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᑯᐯᒃᑯᓐᓄᑦ.  ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᑯᐯᒃᑯᑦ ᑌᒪ ᒪᓂᔨᑦᓴᖁᖅ ᐅᓐᓂᑑᑎᐅᖕᖏᑐᒥᒃ ᑐᑦᓯᕋᐅᑎᒥᒃ ᑖᒃᑯᓄᖓ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᑳᓇᑕᓕᒫᒥᒃ ᐊᑭᓴᕐᑐᓂᐅᕈᓯᐅᓲᒥᒃ. ᑖᓐᓇ ᐊᑑᑎᓂᖅ ᐃᓚᓕᒃ ᓇᐅᑦᓯᑐᐃᒋᐊᓕᕐᕿᓂᕐᒥᒃ ᑐᑦᓯᕋᐅᑎᒥᒃ ᒪᓕᓪᓗᒋᑦ ᑳᓇᑕᓕᒫᒥ ᐊᓂᕐᑎᕆᔪᐃᑦ ᐱᔪᓐᓇᐅᑎᖏᑦᑕ ᕿᒥᕐᕈᔭᐅᓂᐅᓲᑦ ᑐᑭᑖᖓᓂᒃ ᒣ 26, 2027-ᒥ, ᑐᕌᕐᓱᓂ ᓱᕐᖁᐃᓯᐊᕐᓂᒧᑦ ᐊᔾᔨᒌᑦᑎᓯᓂᕐᒥᒃ, ᓴᐳᒻᒥᓂᕐᒧᓗ ᐱᐅᓂᕐᐹᓂᒃ ᐱᐊᕋᐅᑉ ᐱᒍᒪᓲᖏᓐᓂᒃ, ᐱᕕᖃᕐᑎᓯᓂᖃᕐᓱᓂᓗ ᐃᓗᕐᖁᓯᑎᒍᑦ ᓈᒻᒪᓈᕐᑐᓂᒃ ᐱᔾᔪᔨᒍᑎᓂᒃ. ᑎᑭᐅᑎᑐᐃᓐᓇᕆᐊᓕ ᑭᖑᓯᕐᓂᓂᒃ ᑐᑦᓯᕋᐅᑎᓕᐅᕐᓂᓂᒃ.  ᑌᒪ ᑭᖑᓂᐊᒍᑦ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᑳᓇᑕᓕᒫᒥ ᑐᑭᑖᕆᓯᒪᔭᖓ, ᐊᖏᕐᓂᖅ ᐅᕝᕙᓘᓐᓃᑦ ᐊᖏᕐᑕᐅᓂᖕᖏᓂᖅ ᐊᓪᓚᓯᒪᔪᖅ ᒪᓂᔭᐅᒐᔭᕐᑐᖅ ᑐᔫᑎᐅᓗᓂᓗ ᑖᑦᓱᒧᖓ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ ᑯᐯᒃ, ᑐᔫᑎᐅᒐᔭᕐᓗᓂ ᑖᑦᓱᒧᖓ ᐱᐊᕋᕐᒥ ᓯᕗᓪᓕᐅᔨᓂᖅ ᓄᓇᕕᒃ  ᑐᑦᓯᕋᕐᑐᓗ.